انواع طلية الحلويات اختاري ما يناسب حلوياتك

يونيو 22, 2017 admin

انواع طلية الحلويات

3 وصفات معتمدة ، نبدل بيناتهم حسب الحاجة ، يعني إذا قاطو ساك مثل الصابلي ، ندير وصفة الطلية بالحليب ،إذا قاطو تع مناسبة مهمة وتكون الكمية قليلة : ندير طلية روايال

و إذا مناسبةوتستلزم كمية كبيرة ندير الطلية تع السيرو

1/ طلية الحليب :

وصفة مضمونة و بزاااااااااف ناس معتمدينها ، المليح فيها أنها تنشف بسرعة ، خفيفة ، بنينة ، تصلح للحلويات الجافة و حتى لحلويات المناسبات

لكن الي ماشي مليح فيها أنها تبدا تطلق اذا طولت ، يعني تميه شوية ، و حتى طعمها يتبدل ، و إذا حطيتي الحبات فوق بعضاهم راهي رايحة تفسد تماما .

لذلك يتسحسن أنها تستهلك في أقرب وقت ، يعني ماتفوتش أسبوع ....

المقادير بسيطة : ديري كيلة حليب سائل بحرارة الغرفة ، كيلة زيت ، كيلة ماء الزهر ، شوية عصير ليمون ، خلطيهم مع بعض بملعقة ، و ابداي تزيديلهم في السكر الناعم المغربل بشوية حتى تولي ثقيلة ...

الطلية تاعك باش تعرفيها بلي راهي واجدة و مليييحة ، تولي ثقيييييييلة ، بمعنى لوكان ترسمي رقم 8 بيها تبقى مدة باش تسيح ، هكذا باش تجيك طلية جيدة ، ماشي غير تثقال شوية خلاص تطلي بيها ، لالا هكذاك رايحة تجيك شفافة ، يتسمى ماشي ناجحة ، زيديلها السكر حتى تثقال مليح و اخدمي بيها .

كي تجي تطلي ، ديري مشبك ، اذا ماعندكش استعملي المشبك تع الكوشة أو الثلاجة ، ديري سنيوة نقية من تحت ، حطي الحبات فوق المشبك ، اذا كنت مبتدئة أبداي بعدد قليل 3 حبات .... ديري فوقهم مغرفة كبيرة طلية أو أكثر ، خليها تهبط شوية ، و احكمي المشبك من الطراف و اخبطيه غير بلعقل باش تهبط الطلية مليح و تتغلف كامل الحبة ، شوفي الحبات تاوعك من كامل الجوانب باش تتأكدي بلي اتطلات كامل

غير تهبط الطلية مليح ، يهبط الزائد منها ، نحي الحبات غير بلعقل ، ارفديهم بفورشيطة من تحت و حطيهم في سنيوة ، و خليهم ينشفو مليح .

بعد ماينشفو تماما ، ارفدي الحبات تاوعك تلقاي فيهم بعض الزوائد تع الطلية يعني شكلهم غير متناسق ، احكمي موس و بداي تنحي فالزائد ، غير بلعقل ...

الحبا ت كامل راهم شكل واحد ، متناسقين و شابين ، جيبي ملمع غذائي ، و بواسطة فرشاة أو اسفنجة أو صبعك اذا ماعندك لا هاذي لا هاذيك ، فوتي الملمع على الحبة كامل ، و زينيها كيما تحبي .

هاذ الخطوات تديريهم مع نوعين الطلية ا لثانيين

الوصفة الثانية :

2/ طلية الشاربات

الشاربات : كيلة سكر + 2 كيلات ماء

سكر ناعم مغربل

2م ك عصير الليمون

2 م ك ماء الزهر

بياض بيضة

التحضير : نطيبو الشاربات ، ماء + سكر و نخلوهم يغلو 10 د ، نحطوها بجيه و نخلوها تبرد تماما

على حساب كمية القاطو الي عندك ، إذا بزااااف ديري كمية الشاربات الي عندك ، إذا كمية قليلة ، خذي مقدار فنجال صغير تقريبا بزاااف ...

حطي الشاربات ، زيديلها السكر حتى تتماسك مليح ، هنا زيديلها بياض بيضة ، ماء الزهر و عصير الليمون ، إذا لقيتيها ماهت بزاف زيديلها السكر الناعم المغربل .

نصائح : ماتستعمليش أبدااااااااااا الفوي في نحضير الطلية ، لأنها تديرلك فقاعات هواء تفسدلك شكل الطلية تاعك .

ماتديريش الطلية مايهة و شفافة لأنك راكي تخسري فالسكر تاعك بااطل ، 

إن شاء الله إذا اتبعتِ النصائح هاذي نأكدلك بلي تخرجلك طلية هااايلة شكلا و ذوقا ان شاء الله ^^

3/ طلية روايال :

هذي طلية هااااااااايلة ذوقا و شكلا و لمعانا ، تقولي راكي تاكلي فالفوندون ماشي طلية ، هي تطول باش تنشف بصح نتيجتها رووعة ، تصلح للمناسبات ، و الحلويات الي تتهلاي فيها ^^

المقادير :

- بياض بيضة .

- نص فنجال عصير ليمون يعني عصير حبة ليمون تقريبا ( حبة متوسطة ) ، ديري تقريبا 4 ملاعق كبيرة .

- نفس الكمية ماء الزهر .

خلطوهم مع بعضاهم شوية برك ، و ابداو تزيدو في السكر الناعم المغربل بشوية حتى توليلنا طلية متماسكة .

الملاحظات : الملون نستعملوه بعد ما نكملو كل كمية السكر ، باش يعطيلنا اللون المطلوب .

lممكن تستعملي منكهات في الطلية ، يعني اذا كنت دايرة قاطو باللوز ، ندير قطرة منكه لوز فالطلية ، تعطيك طعم راااائع ، و الحلوى تاعك تعبق من بعيد .

و اذا درت صابلي أو مخبز الفلان مثلا : ندير نكهة الفراولة في الطلية تاني النتيجة تكون هاااايلة</div>

مشاركة